Atty. Solima gipatay; misis kritikal

Gipusil. Nagpa­tuo nga mga kliyente ni Atty. Salvador Solima ang duha ka mga killer nga mingsaka sa iyang opisina. Mihangyo pa nga magpatabang sa kaso bahin sa ilegal nga drugas. Human sa istoryahanay, ang usa sa mga suspek nipusil kang Solima ug asawa niini. (Amper Campaña)

NAA sa talandugon nga kahimtang nga gidala sa pribadong tambalanan sila si manlalaban Salvador Solima ug ang iyang asawa nga si Verose human pamusila sa duha ka mga lalake nga nagpatuo nga mga kliyente sulod sa ilang balay sa Singson village, Barangay Guadalupe, siyudad sa Sugbo.

Giingon nga ang gunman nakiglalis pa kang Solima sa usa ka kaso sa wa pa ang pagpamusil.

Paglabay sa pipila ka takna, namatay si Solima sud sa pribadong tambalanan, apan ang asawa giingon nga naa na sa stable nga kondisyon.

Ang katabang sa pamilyang Solima nga si Warlino Caballe unom kaa tuig na nga nagtrabaho sa pamilya, nagkanayon nga nangita kang manlalaban Solima ang mga suspek.

Nagpaila kini nga kliyente nga taga dan A. Lopez, Barangay Calamba, siyudad sa Sugbo, mao nga nisugot si Attorney Solima nga makasulod.

Sa dihang nakasaka na ang duha, nakig-estorya pa kini kang Attorney Solima, apan wa siya masayod unsay ilang gihisgutan.

Pipila ka gutlo ang nakalabay, kalit lang gipusil ang abogado samtang si Verose nga nakakita sa hitabo, nitago luyo sa refrigerator ug gigakos ni Warlino.

Apan gibalikan kini sa usa sa mga suspek ug gidul-itan sa pagpusil sa ulo.

Nakita pa sa 10 anyos niini nga anak babaye ang hitabo.

“Si Attorney ang unang gipusil dayon si Madam. Ako dayong gigakos pagkakita nako nga gipusil si Sir. Pagkahibawo atong usa nga naa sa refrigerator si Madam, gibalikan sya dayon gipusil sa ulo,” matod ni Warlito sa interview sa DYHP RMN Cebu.

Dali nga misibat ang duha ka mga lalake sakay sa usa ka motorsiklo sa wa matino nga direksyon, samtang ang mga kawani sa pamilyang Solima nidagan paingon sa barangay hall aron magpatabang.

Unang gisakay sa ambulansya sa Barangay Guadalupe ang asawa ug gidali pagdala sa Chong Hua Hospital samtang si Solima gisunod usab sa pagdala sa samang tambalanan.

Wa pa matino kon asa ang igo sa abogado.

Ang kapulisan sa Guadalupe nagpadayon pa sa ilang imbestigasyon kon kinsa ang duha ka mga lalake nga nagpusil sa magtiayon ug unsa ang motibo.

Si Senior Inspector Edward Sanchez, hepe sa Guadalupe police station, nimando sa iyang mga sakop nga ilhon ang duha ka lalake.

Ilang gisubay sa pagkakaron ang posibling may kalambigitan sa trabaho sa abogado nga mao usab ang ilang gihimug-atan.

“Ang atong gitan-aw karon mao ning may labot sa iyang trabaho kay nagpa as if man daw ni nga kliyente ni Attorney. Mao na ang subayon kinsa ning iyang mga gipanglabanan sa kaso,” matod ni Sanchez.

Si Solima mao ang abogado ni Jocelyn Mendoza, kapuyo ni anhing Ermita barangay captain Felicisimo “Imok” Rupinta.

Si Solima kanhi Cebu City assistant city prosecutor, kinsa na-dismiss sa serbisyo niadtong Hunyo 26, 1998 tungod sagross misconduct/grave abuse of authority ug gross ignorance of the rules on inquest.

Niadtong 2010 elections, nidagan usab siya sa pagkamayor sa Siyudad sa Sugbo.

Siya usab ang abogado sa Norwegian ug uyab niini nga Pinay nga unang mga suspek sa pagdagit ug pagpatay kang Ellah Joy Pique.

(c) www.sunstar.com.ph